Bacarırsan?!

Gəl dur yerimdə

bax burda,

bu uçurumun kənarında.

Görüm bacarırsan?!

Nə yüksək dozada alkoqol,

nə də rəngli həblər

yoxluğunu unutdurar.

Bu şəhər sanki,

sənin posterlərinlə bəzədilmiş

dörd divar.

Gəl döz öz yoxluğuna,

gəl çək öz həsrətini mənim yerimə...

Görüm bacarırsan?

Biz peysəl deyilik

Xəbərlər efirdədir. Bu gün Amerika Birləşmiş Ştatlarının mərkəzi Vaşinqtonda tələbələr etiraz aksiyası keçiriblər. Onlar verdiyi bəyənnamədə təhsil haqqlarının çox yüksək, təqaüdlərin isə çox az olduğunu bildiriblər. Qeyd edək ki, gənclər Ağ Ev qarşısında kemplər quraraq oturaq aksiyaya keçiblər və tələbləri yerinə yetməyincə aksiyanı dağıtmamaqda israrlıdırlar.

Xəbərlər davam edir. Bu gecə Bakı şəhərində Nizami və Suraxanı rayon sakinləri 21 yaşlı gənclər arasında baş verən qarşıdurma qətllə sona çatıb. İki dostdan birinin digərinə endirdiyi çoxsaylı biçaq zərbələrindən sonra gənclərdən biri yerindəcə həlak olub. Qeyd edək ki, gənclər Bakı Dövlət Universitetrinin 3-cü kurs tələbələridir. İlkin  istintaqa görə hadisəyə zəmin, tələbələr arasındakı şəxsi münasibətlər yəni “peysəl söhbəti” olub.

PS. Yazıyla üst-üstə düşən istənilən hadisə tam təsadüfidir.

Mən qaçırdım, sən tələsirdin

Bizimki film kimiydi.

Yağış yağırdı,

dar küçəydi,

mən qaçırdım,

sən tələsirdin.

Üz-üzə gəldik...

Sanki dondu zaman

slou moişonda.

Sənin baxışların dağıdıcıydı

yıxdı qəlbimin tənhalıq divarlarını

bir anlıq...

Mən uçdum,

sən pərvaz vurdun,

gözlərinin içi güldü,

ağzım qurudu.

Sonra gəzdik yağışın altında

əl-ələ, göz-gözə...

Sonra dodaqların püskürdü;

səni sevirəm!

Dodaqlarım dayanmadı buna...

Sonra evləndik

ev-eşik sahibi, uşaqlar...

Beləcə,

ölənəcən

xoşbəxt həyat sürdük...

Sonra bir-birimizin yanından

düz keçdik

mən qaçırdım,

sən tələsirdin.

Yaylıq

Necəsən?
Söz olsun deyə soruşmuram,
doğurdan necəsən?
Bilirəm…
Kefin kök,
damağın sazdı…
Yoxluğum sənə düşərli,
yoxluğun mənə kədərli.
Sadəcə məndə unutduğun,
yaylığını tapdım.

Köhnə gödəkçəmin cibində,
özümün də unutduğum yaylığını.
Deyirdilər,
yaylığı əldən-ələ verməzlər.