İyirmi İl Öncə və Sonra (20 Yanvar faciəsinə həsr olunur)

İyirmi il öncə iyirmi yanvar Azərbaycan tarixinə öz qanlı möhürünü vurdu.

İyirmi il öncə Azərbaycan xalqı öldü... və yenidən doğuldu!

İyirmi il öncə biz soyuq duşa girdik sanki, sifətimizə dəyən şapalaqların səsindən oyandıq, ayağa qalxdıq və azadlığımızı qazandıq! Görünür biz yalnız başımıza yumruq dəyəndə oyanırıq. Yenə bizi qapazlayan olsaydı, iyirmi il öncəki kimi...

İyirmi il öncə biz həyatın kələ-kötür yollarında qara-qura tarix səhifələrimizi yazdıq!

İyirmi il öncə Azərbaycan adlı ağacı qanımızla suladıq biz!

İyirmi il öncə sinəmizdə açılan yaralar hələ də sağalmayıb, tökülən qanlar qurumayıb! Həmin gün biz heç zaman olmadığı kimi həmrəy idik, bir yerdə idik və çox təəssüf ki o birlik elə orada qaldı.

İyirmi il öncə bizi ağlatdılar... Və biz hələ də ağlayırıq... Demək biz hələ hazır deyilik!

İyirmi il öncə şəhid olanlar bilməzdilər ki iyirmi il sonra biz bütün bu olanları unutmağa başlayacağıq!

İyirmi il sonra başımızın üstündən yenidən güllələr yağacaq, vəhşicəsinə qırılacağıq yenə, bəlkə də, unutqanlığımız üzündən! Unutqanlığımız buna layiqdir! İnsanın gücü yaddaşında, xalqın gücü tarixindədir!